دعوة إلى برمجة مؤتمر الاستثمار “صفاقس 2020”
بالنظر الى انو سي الباجي عندما كان وزير أول ” الصفاقسية لازم يعملو على رواحهم ” في تنمية صفاقس و بما انو عملنا على رواحنا و ما نجمناش نبنيو المستشفيات الجامعية الجديدة المبرمجة و ما نجمناش ننجزوا مشروع المدينة الرياضية وما نجمناش نبنيو المحولات المقترحة و مانجمناش نكبرو المطار و ما نجمناش نحولوا محطة القطارات و ما نجمناش نسكروا السياب و ما نجمناش نعملو بنية تحتية تخلينا نحتظنوا الألعاب المتوسطية و ما نجمناش تكون عندنا ميزانية لتمويل مشاريع هامة في اطار صفاقس عاصمة للثقافة العربية….
نقترح نعملوا مؤتمر استثمار “صفاقس 2020”
هو صحيح علاقتنا الأزلية بالجهات المانحة للدول الشقيقة و الصديقة ما هياش كما من المفترض انها تكون، أما ميسالش نصفيو النية و نعيطولهم بالك يكون ربي هداهم و بالك يكونو فهمو انو تنمية صفاقس من تنميتهم، مثلا من الجهات المانحة هذي، عندك:
وزارة التجهيز لدولة تونس الشقيقة
وزارة الصحة للجمهورية التونسية الصديقة
وزارة النقل و وزارة الرياضة بتونس الي تعتبر الشريك الأول في مواردنا الضريبية ..و غيرها من وزارات دول شقيقة و صديقة بل و ربما حتى مكبلة و محاصرة لينا.
مازالت حاجة لازم نقولوها باش الجهات المانحة ما تخافش برشا، صحيح في صفاقس مجتمع مدني قوي يقدم في افكار و مشاريع و دراسات جاهزة و رؤية كاملة و متكاملة لصفاقس 2030 اما راهو ما يخوفش و لتوة مافهمناش علاه مثلا سي الحبيب الصيد بطل و ما جاش لصفاقس العام الفائت وقت سمع انو مكونات المجتمع المدني باش يعطويه و ثيقة تتضمن مشاريع صفاقس ، راهو هذا المجتمع المدني بصفاقس ما يخوفش بعمرو لا كسر و لا حرق عجالي و لا مقرات و لا سكر معبر و لا اوتوروت و لا حتى زنقة و الناس الي تعمل دراسات يحضروها ناشطين و خبراء في سنين و أشهر و يعطيوا من وقتهم و جهدهم ما يخوفوش كيما ولد صغير يخرج في خلعة و يحرق عجلة و يسكر كياس باش يعطيوه الحق في تهريب سلعة.
لازم الجهات المانحة ما تخافش لانو الصفاقسي من كثر الغبينة ولا يبارتاجي في تصاور صفاقس القديمة و يتمنى يشوف صفاقس في نظافة الستينات و نظام شبكة المرور متاع السبعينات و خاصة يشوف صفاقس كيما قبل من غير “سياب”
لازم الجهات المانحة ما تخافش و تجي ، لحكاية الكل اربعة كلمات يقولوهم “صفاقس عاصمة الجنوب ” ، “صفاقس العاصمة الاقتصادية” ،” الصفاقسية قراية و خدامة”، “السياب بااااااش تتسكر” و يرجعو لديارهم سالمين غانمين
فكروا في مؤتمر استثمار صفاقس 2020 و ماتخافوش ممكن ياسر تنمية صفاقس هي الي تجيب التنمية لصفاقس و للدول الصديقة و الشقيقة زادة.
بقلم مرشد شطورو / موقع تاريخ صفاقس