فضيحة في المعهد النموذجي بصفاقس .. الله الله على قوانين الغلبة
الله الله على قوانين الغلبة .. قوانين هدفها الأوحد و الوحيد تقطع مع أي نشاط ثقافي للتلميذ التونسي و بعد في التلافز يجيو يتشكاو و يتبكاو على الشباب الي هاربة لسورية و على الصغيرات الي تنتحر بربي الى أين ؟ لوين نوصلو بيه المستوى الثقافي فها البلاد ؟ و بعد يوجعولنا راسنا بحكاية الشباب مايع ، الشباب جاهل، الشباب ينتشر فيه الفساد، الشباب مفسدة البلاد و هاك اللاوي.. أيا سيدك ، في المعهد النموذجي منذ 4 سنين ثما تلامذة خذاو المبادرة باش عملو نوادي (Club Lycée Pilote Sfax-Club des Jeunes Pilote) و ولا عندنا أنشطة ثقافية ترفيهية ؛ ندوات على القراية البرة، على تكوين الشخصية، رحلات، حفلات في المعهد نتلمو و نعملو ضحكة و لعبة تلامذة و أساتزة و ادارة و كان تتذكرو هاكي عشوية اللباس التقليدي.. ، الخ و منحكيوش على العروض الي تعبي المسرح البلدي بصفاقس بمواهب تلاميذ هذا المعهد.. سيدي المدير السنة ياسر قانونجي و ياسر مايحبش يفلطي في القانون .. و حط جميع أنواع العوائق لإبطال العرض السنة أما الحمدالله الأستاذ المؤطر ضحى و ضحاو معاه التلامذة كل مانجيو انظموا حدث ياقفلنا كالشوكة في الحلق و يمنع لين تقريبا وقفت الخدمة ، من أولها يمنع عليهم الاجتماع في صالة ههههه جاو يعملو ندوة كالعادة على القراية في ألمانيا و جايبيبن أساتزة من الخارج و تلامذتنا الي يقراو غاد (الليساي كل عام يخرج فوج) منعهم و الله سبحانو أعلم علاه .. قال القانون يمنع.. مشاو هزو قشاقشهم لنزل تو هاهم يتلزو باش يكريو صالة متاع أوتيل باش ينظموا حفلة صغيرة متاع اليساي مع أنو مستانسين الأسبوع هذا ، أسبوع ليالي المعهد النموذجي كل ليلة و شكتبلها من أنشطة و مانحكيوش على الإذاعة المدرسية الي من نهارة خشخش البافل ماحاولوش يصلحوه و لا يعوضوه.. وقتها ماعادش يعرفو يتعضرطو شحضرتولو الشباب؟ على شنوه تربى باش تستناو منو حاجة أخرى ؟
امنة العيادي