سفرة على متن قطار من قابس الى تونس دامت 14 ساعة!

عبّر الشاب عزمي سعيد عن شديد استيائه من السفرة التي قام بها على متن قطار قابس -تونس والي دامت 14 ساعة بالتمام والكمال قائلا ان القطار غادر قابس يوم 1 جانفي على الساعة الحادية عشرة صباحا ليصل الى تونس بعد 14 ساعة اي يوم الاربعاء 2 جانفي، ولكم ان تتصوروا ظروف المسافرين وغضبهم الشديد من خدمات الشركة الوطنية للسكك الحديدية.

وهذا ما رواه الشاب عزمي آملا أن تصل رسالته الى المسؤولين الموقرين:
“1 جانفي 2019 من قابس يخرج التران على الساعة 11:15 متاع الصباح en principe يوصل على الساعة ال16:00 ماكس 17:00 لكن التران هذا 00:00 َمزال موصلش..

التران هذا عمل ڨابس-تونس في 14ساعة، طاح panne أكثر من 4 مرات، تأخير، اكتضاض صغار تعبت كبار داخت وناس هسترت من الحالة لا مسؤول لا contrôleur يفسرلك الوضعية ولا حتى اعتذار.. دازين يعبيو فيها على بعضها تقول علالش ولا معيز..

في 2019 مزالت حالتنا هكا فما عباد مازالت عندها سفرات بعد ما تهبط في برشلونة فما طلبة يسكنو في des foyes إلى يسكرو من 8 و ال9 متاع اليل شكون إلى يتحمل المسؤولية. ..فما في التران بنات يسكنو في حوم خايبة شكون يتحمل المسؤولية كان تصيرلهم حاجة..

سكتت برشا على الموضوع اما المرة هذي يزي تعبنا فدينا تقول عملين علينا مزية tickets ب26 دينار والرحلة المزمرة تخرج بمداخيل تفوق 6 و7 ملاين والمصاريف ماهيش باش تفوت المليون على الرحلة فلوسنا وين ماشية تخدمو في ترانات من عام 1904.